Məqalələr

Mir Cəlalın publisistikasının başlıca mövzuları

XÜLASƏ

Əvvəlcə şeir, daha sonralar isə oçerk və hekayələri ilə tanınan Mir Cəlal çox keçmədən istedadlı və orijinal yaradıcılıq üslubuna malik yazıçı kimi şöhrət qazanmışdır. Səməd Vurğun, Süleyman Rəhimov, Süleyman Rüstəm, Mehdi Hüseyn kimi tanınmış söz ustadları ilə eyni dövrdə yaşayan ədib yazı üslubu ilə həmkarlarından fərqlənərək Azərbaycan ədəbiyyatına yeni nəfəs gətirmişdir. XX əsr Azərbaycan ədəbiyyatının bir sıra nailiyyətləri Mir Cəlalın adı ilə bağlıdır desək, yanılmarıq. O, yaradıcılıq fəaliyyəti dövründə görkəmli nasir kimi Azərbaycan ədəbiyyatı tarixində layiqli yer tutmuşdur. “Bir gəncin manifesti” əsəri ilə belə Mir Cəlal klassik sənətkarlar sırasında öz mövqeyini qoruyub saxlamışdır. Onun yaradıcılıq dünyası ilə tanış olarkən bu qənaətə gəlmək olur ki, yazıçını həyati, milli folklor, xalq təfəkkürü, milli-mənəvi dəyərlərin klassik ənənələrə uyğun inkişafı və bu istiqamətdə yaranan problemlər düşündürmüşdür. Necə ki Sabiri oxuyanda şeirin, Mirzə Cəlili oxuyanda satira və yumorun gücü duyulursa, Mir Cəlalın hekayələrini oxuyanda da oxucu eyni hissləri yaşayır. Hekayələri ilə yanaşı, romanları da yazıçının yaradıcılığında mühüm yer tutur. Onun ilk irihəcmli əsəri olan “Dirilən adam” romanı 1935-ci ildə ayrıca kitab şəklində nəşr edilmişdir. Vaxtilə akademik Məmməd Arif ədib haqqında belə yazmışdır: “Mir Cəlal “Dirilən adam”la diqqətli bir realist yazıçı olduğunu göstərmişdir”.

AÇAR SÖZLƏR

yaradıcılıq üslubu, görkəmli nasir, nəsr dili, realist yazıçı