Məqsəd və mövzular

“Azərbaycan dili və ədəbiyyat tədrisi” il ərzində 4 dəfə olmaqla, Azərbaycan, türk, ingilis və rus dillərində humanitar elmlər istiqaməti üzrə dilçiliyin və ədəbiyyatşünaslığın bütün sahələrinə aid orijinal elmi məqalələr dərc edən resenziyalı, açıq girişli elmi-metodik jurnaldır. Jurnalda Azərbaycan ədəbiyyatı ilə yanaşı, xarici ölkələrin ədəbiyyatının da tədqiqi və tədrisi ilə bağlı elmi-metodik məqalələrin nəşrinə yer verilir. 

Jurnal elmi ictimaiyyət, dilçi-alimlər, filologiya sahəsi üzrə mütəxəssislər, doktorantlar, magistrantlar, Azərbaycan dili və ədəbiyyat müəllimləri, uyğun ixtisas üzrə təhsil alan tələbələr və bu sahə ilə maraqlanan geniş oxucu kütləsi üçün nəzərdə tutulmuşdur.

Jurnalın məqsədi

- Azərbaycan dili və ədəbiyyatının (həmçinin dünya ədəbiyyatının) tədrisi metodikasını araşdırmaq və müasir tədris yanaşmalarını təbliğ etmək;

- Azərbaycan dili və ədəbiyyatının (həmçinin dünya ədəbiyyatının) tədqiqi və təbliği problemlərini araşdıraraq, bu sahələrdəki yenilikləri və həlli yollarını müəyyənləşdirmək;

- Ana dilinin saflığını və işləkliyini qorumaq, dilin zənginliyini tədris vasitəsilə cəmiyyətə aşılamaq;

- Ədəbiyyat və dilin inkişafına dair yeni yanaşmalar və tədqiqat nəticələrinin paylaşmaq, müasir dövrün tələblərinə uyğun tədris üsullarını təbliğ etmək;

- Müasir texnologiyaların və rəqəmsal resursların Azərbaycan dili və ədəbiyyat tədrisində tətbiqi ilə bağlı yenilikçi yanaşmaları araşdırmaq;

- Azərbaycan ədəbiyyatını beynəlxalq səviyyədə tanıtmaq və dünya ədəbiyyatına inteqrasiyasını gücləndirmək;

- Tələbə və müəllimlərin yaradıcı düşünmə qabiliyyətlərini inkişaf etdirmək və dil, ədəbiyyat tədrisində innovativ yanaşmaları təşviq etmək.

Mövzu sahələri

Dil və ədəbiyyat tədrisinin innovativ metodları: Müasir tədris texnologiyaları, rəqəmsal alətlər və onlayn platformaların Azərbaycan dili və ədəbiyyatının tədrisinə tətbiqi, eləcə də bu sahədə yeni metodik yanaşmaların inkişaf etdirilməsi.

Dil və ədəbiyyatın sosial və mədəni aspektləri: Dilin sosial funksiyaları, ədəbiyyatın cəmiyyətə təsiri, dilin mədəniyyətlə əlaqəsi və ənənəvi dəyərlərin ədəbiyyat və dil vasitəsilə tədrisi.

Təhsil və dil siyasəti: Azərbaycan dilinin tədrisi və qorunması, dövlətin dil siyasəti və onun tədris sistemində tətbiqi.

Azərbaycan dilinin xarici dil olaraq tədrisi: Metodologiya, dillərarası və mədəniyyətlərarası aspektlər.

Dil və ədəbiyyatın psixoloji aspektləri: Ana dilinin psixoloji inkişafdakı rolu, ədəbiyyatın insan psixologiyasına təsiri, uşaq ədəbiyyatının psixoloji xüsusiyyətləri və uşaqların dil inkişafı.

Qloballaşma və dilin dəyişimi: Qloballaşma şəraitində dilin inkişafı, dilin zənginləşməsi məsələləri, yeni terminologiyanın yaranması və bu dəyişikliklərin tədrisə təsiri.

Müasir Azərbaycan ədəbiyyatının problemləri və inkişafı: Azərbaycan ədəbiyyatının müasir dövrdə qarşılaşdığı problemlər, yeni yazıçılar və poetik istiqamətlər, Azərbaycan ədəbiyyatının dünya ədəbiyyatında yeri.

Dil və ədəbiyyatın təbliği: Azərbaycan dilinin və ədəbiyyatının xaricdə təbliği və Azərbaycan ədəbiyyatının beynəlxalq səviyyədə tanınması.

Dil və ədəbiyyatın pedaqoji praktikasına dair tədqiqatlar: Müəllimlərin tədris bacarıqlarının artırılması, təhsil müəssisələrində dil və ədəbiyyat tədrisinin effektivliyinin yüksəldilməsi, məktəb və universitetlərdə ədəbiyyatın tədrisi, ədəbi əsərlərin pedaqoji cəhətdən təhlili.

Dil və ədəbiyyat sahəsi ilə bağlı yeni nəşrlər: Azərbaycan və dünya ədəbiyyatında, dilçilik sahəsində yeni nəşrlər, elmi kitablar, monoqrafiyalar, dərsliklər və metodik vəsaitlərin təhlili.