Beynəlmiləl Universitet – Qarabağ Universiteti
Keçmişimizə qısa
nəzər salsaq, görərik ki, hər zaman elmə, təhsilə və mədəniyyətə dəyər verilən
Qarabağda ali təhsil ənənəsi tarixən
mövcud olmuşdur. Belə ki, 1969-cu ildə Azərbaycan Pedaqoji İnstitutunun filialı
olaraq əsası qoyulan və 1973-cü ildən 1988-ci ilə kimi müstəqil fəaliyyət
göstərən ilk ali təhsil müəssisəsi Qarabağda məhz Xankəndidə idi. İşğal
dövründə fəaliyyətini dayandırmağa məcbur olan institut illər sonra Azərbaycan
Respublikası Prezidentinin 28 noyabr 2023-cü il tarixli Sərəncamı ilə Qarabağ
Universiteti adıyla yenidən Xankəndi şəhərində yaradıldı. Bu
təşəbbüs işğaldan azad olunmuş
ərazilərimizin yenidən bərpası istiqamətində aparılan uğurlu siyasətin önəmli
addımlarından biridir.
Regionun sosial-iqtisadi ehtiyaclarına uyğun yüksək ixtisaslı kadr
tələbatının ödənilməsi və tarixən mövcud olmuş təhsil ənənələrinin yaşadılması
məqsədilə qurulan bu universitet ilkin
mərhələdə 1000 nəfərə yaxın tələbənin təhsil alması üçün nəzərdə tutulmuşdur. Bu
barədə elm və təhsil naziri Emin
Əmrullayev media üçün keçirilən brifinqdə məlumat vermiş və yeni qurulan
universitetin fəaliyyət istiqamətindən, onun bütün türk dünyasının
fərqli və modern elm və təhsil müəssisəsi kimi dünyada tanınacağından söhbət
açmışdır. Məhz bu üstünlüklər Azərbaycanda və dünyanın müxtəlif yerlərində
yaşayan alimlərin marağına səbəb olmuş, Qarabağ
Universitetində istər daimi əsasla, istərsə
də kömək məqsədi ilə çalışmaq istəyənlərin sayı günü-gündən artır.
Azərbaycan Respublikası Prezidentinin
tapşırığı ilə universitetin akademik heyətinə,
eləcə də təhsilalanlara xüsusi diqqət yetirilməli, yeni yaranmış universitetin
beynəlxalq səviyyədə tanınması üçün bütün imkanlardan istifadə olunmalıdır. Müasir dövrün tələblərinə uyğun şəhərciyin
yaradılması, şəhərcikdə bütün xidmətlərin yüksək tələblərə cavab verməsi,
elmi-tədqiqat işləri ilə məşğul olan yaradıcı tədqiqatçıların layihələrinin
dəstəklənməsi üçün şəffaf və ədalətli mühitin formalaşdırılması və s. təhsildə
yeni sistemin qurulmasına, universitetin tədqiqat yönümlü olmasına təkan verən
vacib amillərdir. Bütün bunlar uzun müddət diqqət mərkəzində olan universitetlərin
formalaşması, ali təhsilin yenidən qurulması və bu kimi aktual məsələlərin də
həllinə kömək etmiş olacaq.
Hesab edirik ki,
Qarabağ Universiteti qalib dövlətimizin yüksək elm və təhsilinin, uğurlu və
sürətli inkişafının nümunəsi olaraq dünyanın təhsil məkanında yeni bir imza
olacaqdır.
Könül Yadigarova
şöbə redaktoru
